دامنه‌ی تلاشی خانه به خانه‌ی طالبان جنایت‌کار به تخار نیز کشانیده شد

تخار، جبهه‌ی مقاومت ملی: صبح امروز دوشنبه ۹ حوت سال جاری، افراد گروه هراس‌افگن طالبان، عملیات تلاشی خانه به خانه را در شهر "تالقان" (مرکز ولایت تخار) آغاز کردند و تا اکنون از تلاشی شماری از منازل مسکونی در محله‌های "زرگری، آهن‌دره و نمک فروشی" از مربوطات شهر تالقان، گزارش شده‌است.

باشندگان تخار می‌گویند که نیروهای خشن طالبان، بدون اطلاع پیشین، به خانه‌های مردم یورش می‌برند و به بدترین شکل، منازل آنان را زیرورو می‌کنند.

بربنیاد گزارش‌های رسیده: تا اکنون ده‌ها منزل مسکونی در شهر تالقان، از سوی افراد جنایت‌پیشه‌ی طالبان تلاشی شده‌است.

این رفتار غیر انسانی و غیر اخلاقی طالبان، نگرانی‌های‌ مردم را بیش‌تر کرده‌است.

نیروهای متجاوز طالبان در چند روز گذشته، تلاشی خانه به خانه را از شهر کابل و ولایت‌های پروان، کاپیسا و پنجشیر آغاز کردند و امروز، شهر "تالقان" مرکز تخار در شمال‌شرقی کشور نیز گواه این عمل نابخشودنی طالبان است.