کابل، د ملي مقاومت جبهه: نن سهار د کابل په لوېدیځ کې د عبدالرحیم شهید لېسه او ممتاز ښوونیز مرکز کې انتحاري او انفجاري بریدونه وشول.
د عبدالرحیم شهید لومړنی ښوونځی د دوو ځانمرګو بریدونو هدف و، چې په لومړۍ چاودنه کې تر اوسه له ۲۵ تر ۳۰ کسانو ته مرګ ژوبله اوښتې ده.
برید له غرمې وروسته د یوه ښوونځي مخې ته په داسې حال کې وشو، چې زده کوونکي له ښوونځي څخه د وتلو په حال کې وو.
دویمه چاودنه په ښوونځي کې هغه مهال وشوه چې ښوونکو او خلکو د پېښې له ځایه ټپیان او جسدونه لېږدول.
په دويمه چاودنه کې د مرګ ژوبلې کره شمېره نه ده معلومه.
له دغو دوو چاودنو سره سم د کابل په لوېدیځ کې په یوه بل برید کې د ممتاز لېسه په نښه شوه.
په دغه چاودنه کې چې په یوه ټولګي کې رامنځ ته شوه، یو ماشوم سخت ټپي او شپږ تنه نور سرسري ژوبل شول.
د دغو چاودنو د قربانیانو شمیر هره شیبه مخ په ډیریدو دی.
په افغانستان کې ښوونځي، پوهنتونونه او حتی روغتونونه تل د ترهګرو لخوا په نښه شوي دي.
