ګارډین ورځپڼې راپور ورکړی چې طالب اورپکو تېرې جنورۍ میاشت کې په مزارشریف کې پر اتو ښځینه بندیانو ډله ییز جنسي تیری کړی دی.
په دغه راپور کې چې د جمعې په ورځ د حوت په ۲۷ مه خپور شو راغلي: د جنسي تیري قربانیان د ښځو د یوې ډلې یوه برخه وه چې غوښتل یې له افغانستانه وتښتي. خو د طالبانو لخوا نيول شوي وو.
د راپور لیکواله عایشه جهانګیر په کابل کې د خپلو ملګرو له قوله وايي: "هغه ښځې چې د طالبانو له ډله ییز جنسي تیري ژوندي پاتې شوې وې، تر خوشې کیدو وروسته د خپلو کورنیو لخوا وژل شوې دي، او یو شمیر نورې ښځې لا هم ورکې دي."
د ویلو ده چې دغه تروريستي ډله د هيواد د خلکو په وړاندې له خپلو جنايتونو لاس نه اخلي او په دغه شان وحشيانه کړنو سره خپله اصلي څېره په ډاګه کوي.
